Publicité
Morisien
Ki to ete twa
Ki mo ete mwa
Mo enn Morisien
Mo dibout lor mo
de lipie
Mo latet lao
Mo fier
Ki mo ete mwa
Mo enn Morisien
Mo latet touzour lao
Mo sorti dan sa zil-la
Mo kouma sa bann
zwazo-la
Momem krestrel, momem
kato, momem dodo
Mo kouma sa serpan-la
Mo fer dimoun per
Tou se kin disparet
mo enkor la
Ki mo ete mwa
Mo enn Morisien
Mo latet touzour lao
Momem Lerwa Batavia
Momem Prins Oranz
Mo konkerir lemond
Mo enn gran mason
Mo’nn ranz sa pei-la
Mo Labourdonnais
Ki mo ete mwa
Mo enn Morisien
Mo gard mo latet lao
Mo res dibout, fier, lib
Mo esklav maron
Momem Prins Ratsitatan
Mo lager pou mo liberte
Mo pa obeir lalwa
Mo pa per zot ziska
Lamor
Ki mo ete mwa
Mo enn Morisien
Mo gard mo latet lao
Mo travers lamer
Momem gran vag
Anval tou sa lakot devan
mwa la
Momem siklonn Carol,
Firinga, Hollanda
Mo balie, mo detrir tou
seki dibout devan mwa
Mo kraz tou sa bann
lasenn to met dan
mo lipie
Ki mo ete mwa
Mo enn Morisien
Mo gard mo latet lao
Mo vir ros mo fer
li vinn lor
Momem kouli ki
plant kann
Mo koupe, mo transe,
mo danse
Mo disan ki koul partou
lor sa later-la
Momem Kali pou koup
latet seki pa krwar mwa
Momem Kwan Tee pou
amenn prosperite lor sa
later-la
Ki mo ete mwa
Mo enn Morisien
Momem zanfan Bondie
Momem Bondie
Momem dife, mo mem
Kreasion, mo mem Destriksion
Momem Shiva kan mo
dans mo sega
Mo lizie rouz
kouma laflam
Mo rasta tourne lor
mo latet
Mo bat later ek mo lipie
Ki mo ete mwa
Mo enn Morisien
Mo gard mo latet lao
Momem Zezi ki pou
amenn tou dimoun
ansam
Momem Azann kan
kriye pou amenn tou
dimoun dan lakorite
Momem gran pie lafous,
mo rasinn inn trape twa
Momem Tambalakok,
pena lot kouma mwa
Momem sa gran badamie
rwayal dan lakour
Jummah mosque la
Tou dimoun fer mo letour,
momem ki amenn
zot tou ensam
Ek to oze dir mwa ki
mo ete?
Mo enn Morisien
Mo gard mo latet lao
Mo blan
Mo malbar
Mo laskar
Mo sinwa
Ki mo ete?
Mo kreol
Mo koz kreol kouma twa
Mo manz kreol kouma twa
Mo viv kreol kouma twa
Mo enn Zilwa Zil Moris
Mo Morisien
Touletan mo pou gard
mo latet lao
To pou rode, to pa pou
kapav tir sa ar mwa
Seki mo ete... tousala
mo ete.
Inspirasion lib: “Bidrohi” par Kazi Nazrul Islam
RAM MOHAMED THOMAS
Publicité
Les plus récents