Latet biskwi Marie pé kraké. Ravi ek so sévé kram-kram pé bav dan minn, li pa oulé ferm so soupap, li fer poutou sévé fermal.

Minis Prins, alias gater makaroni, pa oulé rasson, li swadizan réfiz travay Rs 17 ti millions. Dan so latet, kouma dir éna somon pé naz kont kouran.

Deputy Gesture ek Madam Egalité met dan zar pé dir Lam Shang Leen pé rod dévir zot bol dhal, zot pé dir kamwad kamaron, zot propoz démission. Skandal nek sorti dan trou kouma dir salmi tang.

Lopozision figir kouma bomli sek, pwason salé bwi san so kounouk. Mentor kouma dir inn manz mouss zonn, li pé vomi so trip ek so gro pwa divan tou dimounn dan parlman.

Sesungkur pé tir manzé fotograf, so bodyguard pé gagn li taper, zot krwar nou dormi kanar. So piti ti pé santi lézel poul frir poussé, ziska so lisien pé rod lézo pou mordé. Lafami-la for, pima rodrig fel.

Aksidan pé fer viktim toulézour, dimounn pé gréné kouma zamalac lor koltar, zenn ek vié pé fini kouma satini pom damour. Bann somer pé fié dizef dan vant poul, zot pé atann ki bann roder bout fini pass lor zot latet. Mé péi-la Ti Puri ek touzour dhall-puri.

Lerla, nou Morisien, nou kouma sousou dan dhal, nou manz pistass nou guet sinéma. Mé fodé pa tro amerd nou, tansion lastik tempo kassé.

An atandan, (la) soup sa.