Publicité

Anba tabaZi: «200 000 paglas dan péi, sitiasion alarman»

16 octobre 2017, 16:25

Par

Partager cet article

Facebook X WhatsApp

Anba tabaZi: «200 000 paglas dan péi, sitiasion alarman»

Ki li laktialité, ki li enn ti palab, ki li enn nouvel, tou kozé bon pou kozé. Ou preské… Anou al vey zafer anba tabazi.

M : Mon pays va mal, mon pays va mal…

C : Ki to pé santé ta ?

M : To pann tandé ki minis lasanté inn dir ? Éna 200 000 fou dan Moris.

A : Kiété ? 200 000 fouka ? Hé, aret bav dan minn do…

M : To trouv mwa pé badiné la ? Vrémem sa.

C : Twa tonn tann 200 000, mwa monn lir dan zournal ki éna boukou plis ki sa. Enn dokter ki pé dir sa.

M : É sé ki pir ladan, sé ki éna enn ta zénes.

C : Normal, zot pé tro konsom simik. Get rézilta aster !

A : Kapav akoz zot pé tro fim bat dan latet. Zot pé perdi larézon. Zot servo inn blilé.

M : To pa koné kan fim sintétik vinn toktok mem sa.

R : Hé, pa bann fou sa. Sé bann malad mantal. Éna enn diférans.

M : Fou ouswa malad mantal, tousala bann pagla mem sa.

«Dan Parlman mem éna enn ta déranzé mantal (…) Ek enn visié ki tripot so zafer dan twalet.»

R : Non. Kan nou pé dir malad mantal, nou pé koz bann dimounn déprésif, bann skizofrenn, bann fou…

C : Wé. É pa krwar dan Brown-Séquard éna zis dimounn fou. Bann drogé ek bann déleryom ki éna enn ta lalkol dan lékor, kot to krwar zot alé ?

M : Ek bann fou !

(Zot tou riyé)

R : Hé, bé dan Parlman mem éna enn ta déranzé mantal. Par exanp, to gagn enn visié ki tripot so zafer dan twalet Parlman ek avoy fam bann foto indésan…

C : Pa zis sadik ki éna dan Parlman. Éna osi enn fanatik ki pran li pou enn bel péto ek enn fol ki nek brayé «Order, order» koumadir enn mamadifé.

R : Ki lexanp sa bann politisien-la pé doné… Pa étonan ki popilasion pé dérapé.

A : Éna bann ti zénes pé fer klip porno, éna pé fer mari ar proféser…

M : Wé, éna osi bann paran ki bat proféser ek met-dékol.

R : Bizin pa bliyé bann nwar-cholo ki déklar mari lor koltar, bann lespri déranzé ki touy fam ek galan, bann sadik ki viol vié dimounn san défans…

C : Tamasa bel dan sa péi-la.

A : Bé avek sa kantité déranzé mantal-la, ankor éna plas dan Brown-Séquard sa ?

C : Mwa mo dir ki dan plas met métro dan péi, pa plito ti aranz inpé lopital fou pou sa bann dimounn-la.

R : Wé, Moris pa fek gagn kas ar l’Arabie la. Ti kapav investi inpé pou sa bann malad mantal-la.

M : Exaktéman ! An mem tan, ti kapav kré inpé travay dan péi pou nou bann zénes ki pé tourn pous lakaz.

(Silans)

Mo d’lafin

<p>A : Antouka, sitiasion pé anpiré. 200 000 malad mantal dan enn ti zil kouma Moris, li bien alarman. Sé bann zénes ki fer lavénir enn péi. Bé si zot mem zot pé vinn toktok, ki pou arivé apré ? Gouvernman bizin pa pran sa a la lézer.</p>