Anba tabaZi:«Afors frékant politi…sien gagn pis»

Avec le soutien de

R : «Batiara», «pouritir», «mo pis ar zot», «fémel lisien»… Ki to pa tandé sorti dan labous sa bann politisien-la ?

L : Tou kalité fler to tandé. Laont pou nou péi… Avek Internet, tou dimounn o kouran tou zafer aster

I : Politisien sé enn ras malang sa

B : Mwa mo dir ki avan zot vinn dépité ou minis ek zot al réprézant nou péi, zot bizin al swiv enn kour lor bon manier

R : Wé, zot bien bizin swiv enn kour lor bon manier. Sirtou Soodhun ek Rutnah.

I : Soodhun-la enn lot case ankor sa. Mo dimann mwa kouma li kav ankor minis apré tou sa bann kozé ninport li vomi la.

L : Sa bann politisien-la zamé gagn léson zot. Parey kouma ti roket, nek kontan zapé enn ta pou nanié.

R : Wé, apré zot amerdé kan lapres tir zot manzé.

Ki li laktialité, ki li enn ti palab, ki li enn nouvel, tou kozé bon pou kozé. Ou preské… Anou al vey zafer anba tabazi.

B : Bé ler zournalis dir Rutnah so kat vérité, la osi li mal konpran. Avoka kav kouyon koumsa dooo. Li ti kapav pran lapenn al get définision aboyeur dan diksioner avan zap enn ta.

L : Rutnah pé arazé akoz zournalis pa pé flat li. Li tia kontan balans so laké inpé…

I : Pa kozé ! Pli ou tourn paz pli ou trouv zimaz dan sa péi-la.

L : Apré osi, zot pa koné? Afors frékant politi…sien gagn pis sa!

I : Wé… Afors frékant Chiwawa, Ravi Rutnah inn fini par gagn pis ek zapé.

R : Bé minis lafam ki so rol ladan li ? Li les enn so bann koleg tret enn fam fémel lisien ?

L : Kan boul rouz lévé lerla minis lafam désid pou réazir. Daureeawoo dir Rutnah bizin exkiz li an piblik apré séki linn dir mardi lor enn zournalis.

I : Dayer, minis Daureeawoo dir ki linn mem fer Rutnah koné apré so diskour ki li pa aprouv sa bann kalité propo-la, alor ki li ti ansam ek li ti pé mari riyé tou.

B : Apré lamor latizann… (Li fer enn riyé foutan)

T : Si Fazila Daureeawoo, ministre de l’Égalité du genreeee, pa pé kapav défann bann fam, ki sanla pou fer li alor ? Inn met li la pou fer biblo ?

R : Pa fini… Zot inn ékout sa fim indien ti pé zwé lor radio-la ? Ravi Yerrigadoo finn gélé tou ler sa piti ki apel Husein Abdool Rahim la inn dir ki linn fer fos akizasion kont li.

B : Enn pa vo lot. Sakenn pé tret so kamarad dé tou lé non. Mé finalman, person pa pé pran kont maléré.

I : L’express li, li pé lager ar Défi parski zot breaking news pé vinn breaking bad. Nou ki nou gagné ladan ? Asizé manz pistas… get sinéma

Publicité
Publicité

Rejoignez la conversation en laissant un commentaire ci-dessous.

Ailleurs sur lexpress.mu

Les plus...

  • Lus
  • Commentés
  pages consultées aujourd'hui Statistiques et options publicitaires